DIE nuutste onthulling rakende die wapentransaksies van die regering bevestig maar net weer wat almal wat objektief-krities na die saak kyk lankal weet: hier broei 'n skandaal.

Aanvanklik was dit net Tony Yengeni, hoofsweep van die ANC, se duur viertrek-Mercedes wat onder die loep gekom het. Daarna het 'n filiaalmaatskappy van DaimlerChrysler, die European Aeronautic Defence and Space Company (EADS), erken dat hy aan sowat dertig mense, onder wie LP's, "bystand" verleen het om voertuie te bekom.

Daardie lys is nog nie bekend gemaak nie, maar nou het aan die lig gekom dat een van die mense wat bevoordeel is, die hoof van die weermag, genl. Siphiwe Nyanda, was. Ander mense wie se name ook pas bekend geword het, is mnre. Llew Swan, gewese hoof van Krygkor, en Mavan Pillay, wat tot onlangs 'n direkteur van die departement van handel en nywerheid se teenhandelafdeling was.

Al drie dié mense was in een of ander hoedanigheid by die onderhandelings oor die wapentransaksie van tussen R40 en R50 miljard betrokke. Wat Yengeni betref: hy was voorsitter van die Parlement se gesamentlike komitee oor verdediging toe hy sy Mercedes verkry het. Hy wás dus in 'n invloedryke posisie en kon sake beïnvloed.

Die ondersoek na die wapentranksie sal moet aantoon watter rol Yengeni en ander gespeel het. Wat reeds vasstaan, is dat EADS 'n groot hap van die wapentransaksie gekry het.

Dié maatskappy het dus rede gehad om geskenke uit te deel. Sy aandeel in die saak sal deeglik deur die ondersoekspan bekyk moet word.

Tot dusver het gebeur wat baie ontleders gevrees het: die openbare sittings om die wapentransaksies te ondersoek, maak dit vir politici en ander rolspelers moontlik om skadebeheer uit te oefen sonder dat kernvrae beantwoord word.

Dit verg egter geen besondere insig om uit te pluis dat 'n patroon van moontlike onreëlmatighede na vore gekom het nie. Pogings om nou nog toe te smeer, sal net die reuk van korrupsie erger maak.

With acknowledgement to Die Burger and News 24.