|
Frankryk Wil Saak teen Firma in SA Keer |
| Publication | Die Burger |
| Date |
2005-11-05 |
|
Reporter |
Adriaan Basson, Dries Liebenberg |
|
Web Link |
Die
Franse regering het met skok gereageer op die besluit van die Nasionale
Vervolgingsgesag (NVG) om die Franse wapenfirma Thales se Suid-Afrikaanse
filiaal (Thint) saam met mnr. Jacob Zuma van korrupsie aan te kla.
Thint
se prokureur het gister ná die NVG se aankondiging gesê die Franse departement
van justisie en Thales is ontsteld oor die besluit om Thint Holdings en Thint
(Edms.) Bpk. te vervolg. Hulle gaan beslis 'n hofaansoek indien om dié aanklagte
nietig te verklaar.
Thales was voorheen 'n staatsonderneming, maar die
Franse regering is nou slegs 'n minderheidsaandeelhouer
*1 in dié internasionale wapenmaatskappy.
Die NVG het in 'n
dramatiese ommeswaai van sy besluit verlede jaar om Thint nié saam met Schabir
Shaik aan te kla nie, aangekondig mnr. Pierre Moynot, huidige hoof van Thint, moet as verteenwoordiger van dié
maatskappye op 31 Julie volgende jaar saam met Zuma in die beskuldigdebank
staan as hulle van korrupsie aangekla word.
Terwyl regskenners die
NVG se besluit geloof het om die derde party in die beweerde omkopery van Zuma
ook te vervolg, het mnr. Ajay Sooklal, Thint se prokureur, dit in geen
onduidelike terme nie gestel dat die NVG nou glo terugkrabbel *2 op sy ooreenkoms met Thint verlede jaar om
dié wapenreus nie te vervolg nie.
Die NVG het regter Hilary Squires voor
die begin van die Shaik-verhoor versoek om die aanklagte teen Thint terug te
trek ná 'n ooreenkoms tussen adv. Bulelani Ngcuka, voormalige direkteur van
openbare vervolging, en Thint se regspan. Dit het behels dat mnr. Alain Thétard,
voormalige hoof van Thint, 'n beëdigde verklaring sou aflê waarin hy erken dat
hy die outeur was van die nou berugte Franse omkoopfaks wat Zuma direk by
omkopery betrek.
Luidens die faks het Zuma ingestem om omkoopgeld van
R500 000 per jaar te ontvang in ruil vir beskerming vir Thint teen 'n
wapenondersoek en vir die bevordering van sy belange in Suid-Afrika.
'n
Paar maande nadat Thétard sy outeurskap erken het, het hy egter in 'n tweede
beëdigde verklaring ontken dat dit op 'n omkoopooreenkoms dui. 'n Handgeskrewe
nota wat glo getik en na Frankryk gefaks moes word, was volgens Thétard slegs losstaande notas wat hy later weggegooi het
*3.
Volgens Sooklal het die NVG se besluit om die aanklagte teen
Thint in die Shaik saak terug te trek op 'n gegewe stel feite berus wat nie
sedertdien verander het nie.
"Die NVG het geweet van Thétard se tweede
verklaring toe die aanklagte in Oktober verlede jaar teruggetrek is. Ons het nie
oor die ooreenkoms teruggekrabbel nie," het Sooklal gesê.
Mnr. Johan du
Plooy, ondersoekbeampte van die Skerpioene, het in Augustus vanjaar in 'n
beëdigde verklaring met 'n aansoek om deursoekingslasbriewe gesê die vroeëre
besluit om aanklagte terug te trek het slegs op die ooreenkoms met Ngcuka berus
en nie die meriete van die saak nie.
'n Voorlopige akte van beskuldiging
van sowat 90 bladsye is gister aan Zuma en Thint se regspanne beskikbaar gestel.
Mnr. Michael Hulley, Zuma se prokureur, het gesê hulle sal die naweek daardeur
werk en volgende week kommentaar lewer.
With acknowledgements to Adriaan Basson, Dries Liebenberg and Die Burger.