Publication: Beeld Issued: Date: 2005-11-19 Reporter: Adriaan Bassow Reporter: Mandy Rossouw Reporter:

Saak 312/11/2005

 

Publication 

Beeld
Date 2005-11-19

Reporter

 Adriaan Basson,
Mandy Rossouw

Web Link

www.news24.co.za

 

Verkragting-storm woed om Zuma en Vigs aktivis

'n Verkragtingsklag word wel teen mnr. Jacob Zuma ondersoek. Die saaknommer is 312/11/2005. En die klaagster is in dié stadium nie van plan om die saak terug te trek nie.

Die klaagster, 'n 31-jarige MIV-positiewe vigsaktivis wat Zuma as 'n vaderfiguur beskou het, het op 4 November 'n klag van verkragting by die Hillbrow-polisiekantoor aanhangig gemaak. Dis 'n dag nadat die verkragting na bewering in Zuma se huis in Forest Town, Johannesburg, plaasgevind het.

Nadat die eerste verkragtingsbewerings Sondag in die Sunday Times gepubliseer is, het ondersteuners van Zuma die afgelope week gesê dit is deel van 'n sameswering om te keer dat hy in 2009 die president van die land word. Dieselfde word gesê van die bewerings van korrupsie waarvan Zuma aangekla word en as gevolg waarvan hy as adjunkpresident afgedank is. Hy is nog die adjunkpresident van die ANC.

Die party se hoogste liggaam, die nasionale uitvoerende komitee (NUK), vergader die naweek in Johannesburg. Hoewel polities onwaarskynlik, is dit vir die ANC moontlik om spoedig teen Zuma op te tree, berig Jan-Jan Joubert. Die NUK het kragtens die ANC-grondwet die mag om enige klag na die nasionale tugkomitee te verwys en sal, as hy wil, dit vandag nog kan doen.

'n Polisielid by die Hillbrow-polisiekantoor het gister bevestig dat die saak daar geopen is en nou deur die polisie se Johannesburgse eenheid teen gesinsgeweld, kindermishandeling en seksuele misdrywe (GKS) ondersoek word.

Volgens 'n polisie-informant word die ondersoek teen Zuma gelei deur supt. Peter Linda, bevelvoerder van dié GKS-eenheid wat bekendheid verwerf het vir sy uitmuntende speurwerk in die ondersoek na Suid- Afrika se ergste reeksverkragter tot nog toe, Fanwell Khumalo.

Linda wou dit nie gister bevestig nie.

Na betroubaar verneem word, het Zuma se vermeende slagoffer 'n senu- instorting gehad nadat die verkragtingbewering in die media openbaar gemaak is.

Sy is jare gelede ook verkrag en het só MIV/vigs opgedoen.

Die vrou het volgens die betroubare informant in 'n stadium oorweeg om die klag terug te trek, maar sy is deur mense na aan haar aangemoedig om voort te gaan. Dit is vermoedelik hoekom sy aanvanklik die verkragting teenoor die Sunday Independent ontken het en ook ontken het dat sy 'n klag teen Zuma ingedien het.

Beeld se informant het bevestig dat sy tans in polisiebeskerming is terwyl die ondersoek afgehandel word.

Die beweerde slagoffer se ma was in Swaziland toe sy van die voorval gehoor het. Sy het dadelik na Durban gevlieg van waar sy na Johannesburg gereis het om glo haar dogter te adviseer om eerder die saak te laat vaar.

Volgens die informant het dr. Zweli Mkhize, KwaZulu- Natalse LUR vir finansies en Zuma-vertroueling, vir die ma se reis betaal. Mkhize se woordvoerder het vroeër gesê hy "weet niks van die bewerings nie".

Die ma kon haar dogter nie oorreed om die saak teen hul familievriend terug te trek nie en is terug na haar huis in Durban.

Die klaagster was deel van 'n groep jong vriende wat uitgewekenes was en sedert hul terugkeer na Suid-Afrika gereeld saam met Zuma gekuier het. Hulle het hom as 'n vaderfiguur beskou.

Volgens Beeld se inligting is die vrou nie tans in 'n verhouding nie en het sy op aandrang van haar dokter, wat haar ná die beweerde voorval ondersoek het, 'n klag teen Zuma ingedien.

Mnr. Michael Hulley, Zuma se prokureur, was nie gister vir kommentaar beskikbaar nie, maar het vandeesweek telkens ontken dat sy kliënt die vrou verkrag het.

Met erkenning aan Adriaan Basson, Mandy Rossouw en Beeld.